Tuesday, 17 November 2015

އެޑިއުކޭޝަނަލް ޓެކްނޮލޮޖީ އުފެދިގެންއައި ގޮތާއި އޭގެ ތާޜީޚް

އެޑިއުކޭޝަނަލް ޓެކްނޮލޮޖީއަކީކޮބާ؟
     އެޑިއުކޭޝަނަލް ޓެކްނޮލޮޖީއަކީ ކިޔަވައިދިނުގައި އިތުރަށް ފަސޭހަކޮށްދޭ ވަސީލަތެކެވެ.  މީގެ ތެރޭގައި ހިމެނޭ ކަންތައްތަކުގެ ތެރޭގައި މެސެޖްކުރުމާއި ، މީހުން ކިޔެވުމަށް ގެންގުޅޭ އުކުޅުތައް ދަސްކުރުން ހިމެނެއެވެ. އެއާލާތްތައް ބޭނުންކޮށްގެން ޑިޒައިންކުރުމާއި، އުފެއްދުންތެރިކަމާއި ކަންކަންފަސޭހަ ކޮށްދިނުމަށްވެސް ޓެކްނޮލޮޖީގެ ބޭނުން ހިފައެވެ. ހަމައެހެންމެ ކަންތައްތައް މެނޭޖްކުރުމަށް ފަސޭހަކުރުމާއި ހަރުދަނާކޮށް ކަންތައްތައް ގެންދިއުމަށް  މަގުފަހިވެގެންދެއެވެ. މީގެ މައިގަނޑު އެއްބޭނުމަކަށްވެފައި އޮންނަނީ ޓެކްނޮލޮޖީ ބޭނުންކޮށްގެން މައުލޫމާތު އެއްކުރުމެވެ. އެއީ ފޯނުންކަމަށްވިޔަސް ނުވަތަ ކޮމްޕިއުޓަރަކުންވިޔަސް ވެހެވެ. މިފަދަ ކޮންމެ ވަސީލަތަކުންވެސް މަސައްކަތްކުރެވިދާނެއެވެ. http://etec.hawaii.edu/aboutbackground.html


ޓެކްނޮލޮޖީ ތަރައްގީވަމުންއައިސްފައިވާ ގޮތް 




ޓެކްނޮލޮޖީ އަކީ ކޮބައިތޯ ބަލާއިރު މިކަން ފެށިގެންއައިސްފައިވާ ގޮތަށްވެސް ބަލައިލަން ޖެހެއެވެ. މިގޮތުން މިއީ 2500 އަހަރަށްވުރެވެސް ގިނަދުވަސްވެފައިވާ ކަމެކެވެ. އެގޮތުން ޓެކްނޮލޮޖީ އާއި ކިޔަވައިދިނުމަކީ ވަރަށް ގުޅިފައިވާ ކަމެކެވެ. ފުރަތަމަ އެކަކު އަނެކަކަށް މެސެޖް ފޮނުވާ އުޅުނީ ފާރުތަކުގައި ލިޔެގެންނެވެ. ފަހުން ބަކަރި ހަމުގަޔާއި ފަތްފުށްތަކުގައިވެސް ލިޔެގެން އުޅުނެވެ. ގާގަލުގައި ލިޔެގެން އުޅުނީ ހަތްވަނަ ޤަރުނުގެ ތެރޭގައެވެ. ހަމައެހެންމެ އަގައިންއަގަޔަށް އަޅައިދީގެންވެސް ކިޔައދީ އުޅުނެވެ. މިހުރިހާ ކަމެއްގެ ތެރޭގައިވެސް އެންމެ ބޮޑަށް ބޭނުންކޮށްފައިވަނީ އިންސާނުންނަށް ދެއްވި އެންމެ މަތިވެރި ނިޢުމަތްކަމުގައި ވާހަކަދެއްކުމުގެ ޒަރީއާއިންނެވެ.
     އުނގަންނައިދިނުމަށް ބޭނުންކުރި ވަޞީލަތްތަކަށް ބަލާއިރު ވާހަކަކިޔައިދިނުމާއި އެކު ގެންގޮސްފައިވެއެވެ. ހަމަ އެހެންމެ ވާހަކަކިޔައިދޭއިރު ދިމާވާ މައްސަލަތައްވެސް ފާހަގަކޮށްލެވެއެވެ. އެއީ އެކަކު އަނެކަކާ ހަމައަށް ދާއިރު ކުރިން ކީގޮތަށް ކިޔަން ހަނދާންނެތުމެވެ. ނުވަތަ އެގޮތަށް ކިޔައިދޭން ނޭގުމެވެ.  މިގޮތަށް އަނގަބަހުން އިލްމުފެތުރުމުގައި މައްސަލަތައް ދިމާވެފައިވަނީ އެހެންވެގެންނެވެ. އެހެނީ އެކަކު ކިޔައިދޭގޮތަށް ގޮސް އަނެކަކަށް ކިޔައިދޭއިރު ތަފާތުތަކެއް އައިސްފައި ހުންނާތީއެވެ.
     ދިވެހިރާއްޖޭގެ ތާރީޚަށް ބަލާއިރުވެސް ކިޔަވައިދިނުމަށްޓަކައި ބޮޑެތި އުނދަގޫތަކެއް އުފުލަންޖެހިފައިވެއެވެ. ލިތޯ ޗާޕުންފެށިގެން އައިސް ޓެކްނޮލޮޖީ ތަރައްގީވީއިރު،  މީގެ ވިހި ތިރީސް އަހަރު ކުރީން ރާއްޖޭގައިވެސް ކިޔަވައިދޭން އުޅެންޖެހިފައި އޮތީ ވަރަށް އުދަގޫ ދަތި ގޮތަކަށެވެ. ސަބަބަކީ ޓެސްޓް ޕޭޕަރު އަތުން ލިޔެގެން ދޭން ޖެހުމެވެ. އޭގެ ދުވަސްކޮޅެއް ފަހުން ސްޓެންސިލް ގައި ލިޔެގެން ޕޭޕަރާއި ވޯކްޝީޓް ތައް ހަދާއުޅުނެވެ. އޭރު ތަސްވީރެއް ހޯދަން ޖެހުނަސް ލިބޭނެގޮތެއް ނޯވެއެވެ. ޖެހޭނީ ކުރަހާށެވެ. ޒަމާންތަރައްޤީ ވަމުން ދިޔަވަރަކަށް ތަފާތު އެއްޗެހި ތަޢާރަފްވަމުންދިޔައެވެ. އޭގެ ތެރޭގައި ޓައިޕްރައިޓަރ ހިމެނެއެވެ.
     1925 ހާ ހިސާބުގައި ކުލާާސްތަކުގައި ރޭޑިޔޯ ބޭނުންކުރަންފަށާފައިވެއެވެ. އަދި ފަހުން އޯވަރހެޑް ޕްރޮޖެކްޓަރތައް ތަޢާރަފްވެ ކިޔަވައިދިނުމަށް ބޮޑެތި ފަސޭހަތަކެއްވެގެންދިޔައެވެ. ވުމާއެކު ފިލާވަޅެއް ކިޔައިދިނުމަށްޓަކައި ވަގުތުން ވަގުތަށް ކުރަހާލާ ހެދުމަށްފަހު ކުދިންނަށް ދައްކަން ފަސޭހަވެގެންދިޔައެވެ. އެހެންނަމަވެސް މިގޮތަށް ޕްރޮޖެކްޓަރ ލިބިފައިވަނީ ބޮޑެތި ސުކޫލްތަކަށްކަމުގައިވެސް ފާހަގަކޮށްލަންޖެހެއެވެ. 1960 ގެ އަހަރުތަކަކީވެސް ފާހަގަކޮށްލަންޖެހޭ އަހަރުތަކެކެވެ. ޓެކްނޮލޮޖީގެ ދާއިރާއަށް އިތުރު އިންޤިލާބެއް ގެނުވީ މިދުވަސްވަރުގައެވެ. އެއީ މައިކްރޯ ކޮމްޕިއުޓިންގ ތަޢާރަފްވުމާއި ގުޅިގެންނެވެ. އެޔާއެކު ލިޔެކިޔުމަށް ލިބުނު ފަސޭހަތައް ވަރަށް ބޮޑެވެ. އަދިހަމައެހެންމެ ވީސީއާރ ގެނެސް އޭގެ ބޭނުން ހިފަން ފެށުމުން ވަރަށް ގިނަ ފަސެހަތަކެއްލިބުނެވެ. އޭގެތެރޭގައި ފިލްމާއި ޑްރާމާފަދަ ތަކެތި ރެކޯޑްކޮށް ފަހަށް ރައްކާކުރުމުގެ ފަސޭހަކަން ލިބިގެންދިޔައެވެ. އެހެންކަމުން ކޮންމެ ގެއެއްގައިވެސް ވީސީއާރެއް ހުރުމަކީ ކޮންމެހެން މަޖުބޫރުކަމެއްގެ ގޮތުގައި ވެގެންދިޔަކަމެކެވެ.
           ޒަމާނަށް އަންނަ ބަދަލާއެކު ޓެކްނޮލޮޖީގެ އާއުފެއްދުންތައް ފަސޭހަގޮތްގޮތަށް ތަޢާރަފްވަމުން އަންނަމުންދިޔައީ ހަލުވި ކަމާއެކުގައެވެ. އިލްކްޓްރޯނިކް ރިސާރޗްގެ ސަބަބުން ލިބުނު ކުރިއެރުންތައް ފާހަގަކުރެވޭހާ ހަލުވި މިނެއްގައި ކުރިއަރައިގެންދިޔައީ މިސަބަބު ތަކަށްޓަކައެވެ.
           1980 ގެ އަހަރާއި 1990 އަހަރާއި ދެމެދުގައި ކޮމްޕިއުޓަރާއި ލެޕްޓޮޕް ތަޢާރަފްވިއެވެ. ޓީޗިންގ އެއިޑްގެ ގޮތުގައި ކާޑުތަކާއި ފޮތްތައް އުފުލުމުގެ ބަދަލުގައި އައިޕެޑް ހިފާލައިގެންގޮސް ކުދިންނަށް ކިޔަވައިދިނުމަކީ ނުހަނު ފަސޭހަކަމެއްކަމުގައި ވެގެންދިޔައެވެ. ތަސްވީރުތަކާއި ކާޑުތަކުގެ ބަދަލުގައި ސާފުރީތި މަންޒަރުތައް ދައްކާ ކުދިން ޝައުޤުވެރިކުރުމުގައި ނުހަނު ބޮޑު ފަސޭހަތަކެއް ލިބުނެވެ.
     ދިވެހިންނަކީ ޓެކްނޮލޮޖީއާއެއްކޮށް ދަތުރު ކުރާ ބައެކެވެ. މާރކެޓަށް އަންނަ ކޮންމެ އާވައްތަރަކާއެކު ދިވެހިންވެސް އެއްފިޔަވަޅު ކުރިއަށް ޖެހިލައެވެ.އެހެންކަމުން ޓެކްނޮލޮޖީގެ ދުނިޔޭގައި ދިވެހިންނަކީ އެޔާ ނުހަނު ރަޙުމަތްތެރިބައެކެވެ.
           އުނގެނުމާއި އުނގަންނައިދިނުމުގައި ޓެކްނޮލޮޖީގެ ދައުރު ވަރަށްބޮޑެވެ. ސަބަބަކީ ލިބޭ މަޢުލޫމާތު އިތުރުވުމުވާއި ހަނދާނުގައި ގިނަދުވަހު ބަހައްޓަން ފަސޭހަވުމެވެ. ހަމައެހެންމެ ދުނިޔޭގެ ކޮންމެ ތަނެއްގައި ހިނގާ ކަމެއްވެސް ވަގުތުން ވަގުތަށް ކުދިންނަށް ދައްކާ އެއާމެދު ވާހަކަ ދައްކާ ބަޙުޘް ކުރުމަށް މަގުފަހިވެގެންދިއުމެވެ. ހަމައެއާއެކު މިގޮތަށް ކިޔަވައިދިނުމުން މުދައްރިސާއި ދަރިވަރާއި އޮންނަ ގުޅުން ބަދަހިވެ ދެފަރާތުން ކުރެވޭ އިތުބާރު ބޮޑުވެގެންދެއެވެ. އަދި ތަޢުލީމާއި ގުޅުންހުރި މައްސަލަތަކަށް ޙައްލު ލިބިގެންދިއުމެވެ. އަދި ހަމައެއާއެކު ދަރިވަރުންގެ ކިޔެވުމަށް ރަގަޅު އަސަރުކުރުވާ ކަމަކަށްވެސް މިކަންވެގެންދެއެވެ. އޭގެ ތެރޭގައި ގިނަ ޙިއްސުތައް ބޭނުންކުރެވުމާއި ،ޙާޞިލްކުރެވޭ މިންވަރު އިތުރުވެގެންދާކަމަށް ދިރާސާ ތަކުން ދައްކައެވެ. މީގެއިތުރުންވެސް  ދަރިވަރުންގެ ކުޅަދާނަކަން އިތުރުވާކަމީވެސް ފާހަގަކޮށްލަންޖެހޭ މުހިންމު ކަމެކެވެ.
           މުދައްރިސަކު ކުލާހަށް ވަންނައިރު އެންމެ ބޮޑު ޢަޒުމަކަށްވެފައި އޮންނާނީ ކުދިން ޝައުޤުވެރިވާ ރަނގަޅު ފިލާވަޅެއް ގެންދިއުމެވެ. ހަމައެޔާއެކު އެފިލާވަޅަކުން ބޭނުންވާ މަޤްޞަދު އޭގެ އެންމެ ފުރިހަމައަށް ޙާޞިލްވާ ފިލާވަޅަކަށްވެސްވުން ވަރަށް ބޭނުންވާނެއެވެ. އެހެންކަމުން ފިލާވަޅެއް ކުރިއަށް ގެންދިއުމުގައި ޓެކްނޮލޮޖީގެ ބޭނުންހިފާނަމަ ދަރިވަރުން ޝައުޤުވެރިވާލެއް ބޮޑުވާނެއެވެ. އަދި ކިޔަވައިދޭ އެއްޗެއްވެސް ފަސޭހައިން އޮޅުފިލާނެއެވެ.  

11 comments:

  1. ފައިދާ ކުރުވަނިވި މައުލޫމާތުކޮޅެއް ލިބިއްޖެ.

    ReplyDelete
  2. ماشاءالله! ވ.ރަނގަޅު މަސައްކަތެއް!މައުޟޫޢަށް ވަރަށް ފުންކޮށް ބައްލަވާލައްވާފައިވޭ، އަދި ލޭއައުޓްވެސް ވަރަށް ފުރިހަމަ އަދި އެހާމެރީތި! ކިޔަވާކުދިންނަށް މުހިއްމު މަޢުލޫމާތުތަކެއް ލިބޭނެ ލިޔުމެއްކަމަށް ޤަބޫލުކުރެވޭ، مرحبا!

    ReplyDelete
  3. މިއީ ވަރަށް ބޮޑު ތެދެއް. ޓެކްނޮލޮޖީއަކީ ވަރަށް ހަލުއި ކަމާއިއެކު ކުރިއަރަމުން އަންނަ ވަޞީލަތެއް.ވަރަށް ފުރިހަމަ ލިޔުމެއް

    ReplyDelete
  4. މި މަސައްކަތަކީ ޢިލްމީ ގިނަ މަޢުލޫމާތުތަކެއް ހިމެނޭ ރަނގަޅު ދިރާސީ މަޒުމޫނެއްކަން ފާގަކުރަމެވެ. ދިރާސާތަކަށް ތަންކޮޅެއް ގިނައިން ޙަވާލާދެވުނު ނަމަ ވަރަށްބޮޑަށް ރަނގަޅުވީހެވެ. އަދި ދިވެހިރާއްޖޭގެ ތާރީޚަށް ބަލައިލަންފަށާފާ އެންމެ ފުރަތަމަވެސް ލިތޯޗާފުންފެށިވާހަކަ ގެނެވިފާވާއިރު އޭގެކުރިއަށް އިޝާރާތްކުރިނަމަ އެދޭތެރޭގެ ގުޅުން ރަނގަޅުވެގެން ދިއައިހެވެ.

    ReplyDelete
  5. ވަރަށް ފުރިހަމަ މަޒްމޫނެއްކނަ ފާހަގަކުޔރަން. ގިނަފޮޓޯ ހިމަނާލެވުނުނަމަ އަދި މާފުރިހަމަވީސް

    ReplyDelete
  6. ގިނަ މަޢުލޫމާތު ތަކެއް ލިބިގެން ހިނގައްޖެ
    ފޮޓޯތައް ގިނަކޮށްލިަނަމ އިތުރަަށް ފުރިހަމަ ވާނެ

    ReplyDelete
  7. މި ލިއުމުގައި ބޭނުންތެރި މައުލޫމާތު ގިނަކަން ފާހަގަކުރަން. އެހެން ނަމަވެސް ލިއުމުގައި ބޭނުންކޮށްފައިވާ ފޮޓޯއަކީ މުސްލިމުން ބޭނުންކުރަން އެންމެ ރަނގަޅު އަޤީދާއާއި ފުށުނާރާ ފޮޓޯއެއްތޯ ސުވާލު އުފެދޭ! (އެ ފޮޓޯއަކީ މޫސާގެފާނު ކަމަށް ހެދިގެން އިން މީހެއްގެ ފޮޓޯއެއް) އިންޓަނެޓުން ނަގާ މިފަދަ ތަކެތީގެ ހަޤީޤަތް ބެލުމަށްފަހުގައި ނޫނީ ލިއުންތަކުގައި ބޭޏުންކުރުމަކީ ރަނގަޅުކަމެއް ނޫން..

    ReplyDelete
  8. ވަރަށް ފުރިހަމަ މައުލޫމާތު ތަކެއް ލިބިގެން ހިނގައްޖެ ލިޔުމާއި ގުޅޭ ފޮޓޯ އިތުރު ކޮށްލިނަމަ އިތުރަށް ރަނގަޅުވީސް

    ReplyDelete
  9. ވަރަށް ފުރިހަމަ މައުލޫމާތު ތަކެއް ލިބިގެން ހިނގައްޖެ ލިޔުމާއި ގުޅޭ ފޮޓޯ އިތުރު ކޮށްލިނަމަ އިތުރަށް ރަނގަޅުވީސް

    ReplyDelete
  10. މި އާޓިކަލް ކިޔާލުމުން އެޑިޔުކޭޝަން ޓެކްނޮލޮޖީގެ ތާރީޚާ ބެހޭ ގޮތުން ވަރަށް ގިނަ މަޢުލުމާތުތަކެއް ލިބިއްޖެ.... ވަރަށް ފުރިހަމަ

    ReplyDelete
  11. ލިޔުމަކީ މައުލޫމާތުގެ ގޮތުން ފުރިހަމަ ލިޔުމެއް. އެކަމަކު މަޒުމޫނު ސްޓައިލަށް ލިޔެފައި ހުރުމުން އިންޓަރ ނެޓުން ކިޔަން ތަންކޮޅެއް އުނދަގޫ. އޭގެ ބަދަލުގައި އަރިމަތީ ސުރުޚީ ޖަހައިގެން ލިޔެލިނަމަ ވަރަށް ފުރިހަމަ ވީސް.

    ReplyDelete